DeeGor Ho Instagram – ‼️長經文慎入‼️ 禮物同信我都收好多 多謝晒咁多位❤️ 為左答謝你地 又成日問我幾時講經咁… 今年生日就打封信俾大家🫶🏻 ——————————————————— 「To 各位親愛的羊群/雯雯/404： 大家最近都好嗎？不過我都知，有過得好，有過得唔好，或者我更應該問自己過得好嗎？我冇理由話自己過得唔好，8月10係我生日，亦都係 #陰目偵信 上映，雖然Error班賤人做訪問話我先係主角，但我係拍攝現場過程係感受到導演係想有四位男主角嘅方式去拍攝，結果我係首映時睇完後完全睇到電影係有四位男主角😎所以我先係冇吹水個個！ 但其實呢部戲係絕對可以將佢變成三小時嘅電影咁去睇，我相信你地會睇得仲過癮，人物心路歷程會更完整，不過拍嘢就係咁，綜藝都係咁，永遠拍多冇少，但大家都平等地局限於播放時數呢個設定上，所以過程係用一種「理解完靠估」嘅精神去盡力完成❤️‍🔥而呢部電影絕對係台前幕後嘔心瀝血下一齊完成，好希望大家都一齊睇完笑聲笑聲滿載溫馨少少血脈沸騰咁離開電影院。 呢期我當然非常幸運，有代言又有廣告，仲要終於有部Error主演嘅電影，又有Error團綜，嚟緊我地仲有新歌，而我演戲路上亦越嚟越多機會俾我，所以我真係好幸福好開心； 不過有陰就有陽 有幸福開心同時當然會有焦慮擔心嘅時候，所以你地唔洗擔心我㗎，因為我每日都時不時擔心自己😂好飽㗎啦～ 為未來擔憂係天性，我右腦平時會話我知，感受當下嘅幸福感，但當下嘅一切用右腦感受完之後，就輪到左腦話我知「呢一切係咪會隨時完結？」、「未來仲有冇好機遇？」、「人氣接落嚟係咪會永遠停滯？」、「香港觀眾已經唔再需要我地娛樂？」、「本地電視、電影、音樂…好似越嚟越少人留意」、「開返關後嘅娛樂氣候又好似回復當初封關前嘅狀態嗎？」「會唔會再冇突破嘅空間？」….等等 好多好焦慮嘅想法，會跑出嚟但每當我見到你地每一位都仍然堅持緊守崗位去用各種方法支持自己偶像，就會用右腦感受當下你地帶俾我嘅幸福感，去提醒自己，如果我繼續同左腦周旋，我就會錯過你地帶俾我嘅幸福感，咁樣會好可惜。 快五年了，由出道去到「自肥」再去到「毒舌」，一步步咁幸運地上到新高峰嘅呢段旅程…依家回頭望，真係長得嚟又好短暫，真實得嚟又好夢幻，我血液裡仍然充滿住種種旅程帶來嘅餘溫，將我生命帶咗去一個我未曾想像過嘅高度， 而我知道幸運背後另一個因素就係你地，或者又可以咁講，我最大嘅幸運就係遇到你地吧，我地三唔識七，但你地又會真心真意出錢出力咁去支持我地搞嘅做嘅每一件事，而呢五年，我由唔識點應對你地，去到開始識得同你地玩，再去到建立咗一個好似熟得嚟仍然又三唔識七嘅關係，再慢慢開始會為你地心痛💔因為知道你地背後默默地做咗幾多燒清腦細胞嘅安排，再進化到見到網上有人負評你地，由當初「網絡世界係咁架啦」嘅心態，去到真心會睇到有啲情緒心諗「洗唔洗呀？你又邊位有幾威呀？有三頭六臂㗎？憑咩鬧佢哋？你鬧我算啦，我提供娛樂俾你！」嘅情緒…就知道我地已經不知不覺建立咗一段有血有肉嘅關係，而呢個關係「粉絲與偶像」已經不足以去形容，因為入面係綜合晒「部份友情、愛情、親情元素」一種熱血得嚟又浪漫而且充滿愛與關懷嘅關係，而我係呢段關係上，我知自己係可以處理得更好，我份人粗心大意，見到目標就追住跑，好易忽略身邊嘅風景，但你地都對我仍然不離不棄，請俾我係度再講多一次「多謝你」。 最近又多咗啲稱號，「前列腺哥」、「黑色西蘭花」、「磨轆西瓜」…呢個真係一個#0尊地獄 首先我鍾意綠色，但西瓜偏偏係綠色，搞到我以後著綠色衫你地只要小畫家加啲黑色直間，個西瓜就呼之欲出。 其次我經常用嘅支持一哥手勢，結果依家自己騎劫返自己嗰手勢，好似說明緊我低佢地一智商或者我本人差一智商咁，傷感。 而最後正正係最不幸，發生係Error身上，奠定咗我永恒被團欺嘅定位。 不過我已經完全接受咗呢個稱號，因為生日當日「磨轆西瓜」俾咗一個啟示我 當日我去完fans包場戲院謝票後， 我發現戲院商場樓下竟然有一個巨型西瓜嘅擺設 我之前一直都唔知有舊咁嘅嘢 但我肯定個西瓜嘅出現係完全唔關我事 而命運令佢必然地出現係我眼前 我望住個西瓜突然諗通咗啲嘢 其實擔心焦慮危機意識可以係好事 如果冇就唔識未雨綢繆啦 不過更重要係… ‼️接落嚟嘅說話只能意會係不能說明‼️ 人地今日擺個巨型西瓜出嚟 唔係因為你係磨轆西瓜 但只要你有覺悟成為磨轆西瓜 人地聽日擺個磨轆西瓜出嚟 就係因為你係巨型西瓜 咁就磨轆西瓜啦🍉 信，打到呢度就完啦 祝福閱讀嘅每一位 都身體健康 幸福滿滿 笑口常開❤️ 多謝你地每一位嘅生日祝福 最後當然要用TG例牌說話結尾 時候都差唔多要潛水啦 Love you all ❤️ 愛真主 愛羊群 愛會長 2023 – 8 – 12 Dee上 」