Sulaf Fawakherji Instagram – حققت كتير من أحلامي والحمدلله
بس في حلم سعيت باتجاهه من طفولتي
وكل مرة يتأجل لسبب ما غير مقنع معظم الأحيان
وضل هالحلم مرافقني عمر لدرجة إني صرت خاف منه
وبعدت عنه هيك لصار مستحيل
حلم العزف على آلة موسيقية تحول لهاجس بحياتي
لشدة تعلقي بالموسيقا وتأثيرها الكبير عليي
و غار من كل شخص بيمتلك نعمة العزف
وشوفه بعين إعجاب كبيرة
وكبرت وبقي الحلم غصة بقلبي وانتهى
للحظة وقفت بيني وبين حالي الخايفة
وقلت ليش لينتهي حلم لمجرد إني كبرت
بس هالخوف الساكن فيي ماقدرت اتخطاه وحدي
عيلتي واللي كلهم بيعزفوا كان قرارهم لتحقيق حلمي أقوى مني
لأنهم بيعرفوا تماما حجم هالموضوع جواتي
وكل ما اهرب يجبروني بكل معنى الكلمة
أحيانا برواق واحيانا مو برواق
ومن حوالي سنة ونص واجهت خوفي وحققت حلمي ولمست مفاتيح البيانو وحسيت بمتعة الانتصار لما سمعت أول جملة موسيقية أنا خلقتها وماكنت مصدقة
وماكنت قدرت اوصل لهون بدون معلمتي الجميلة ومعلمة أولادي اللي دعمتني للسما وكل ما بطل ترجعني غصب عني بمحبة
وتقلي انتِ قادرة انا واثقة فيكِ الأستاذة نور عيسى
والأستاذ هيثم أمين اللي مآمن بالجموح الموسيقي اللي عندي
وأصر اني اتعلم الصولفيج واني روح داوم مع الطلاب
وبعد ماكان الصولفيج لغة مستحيلة أصبحت محببة ومغرية
وهيك ابتدت معالم الحلم تكبر وتتوضح وابتديت عيشها
ويكبر قلبي معها يوم بعد يوم ونغمة بعد نغمة
وبعدها بفترة بسيطة وخلال دراستي لشخصيتي رغد عبدالواحد بمسلسل مال القبان وكنت لسا عم دوّر على
مفاتيح للشخصية اللي بدي أديها
لمعت فكرة براسي اني سخر الشي اللي تعلمته للشخصية لانها بتتحمل وجود بيانو ببيتها الشامي العتيق وحالة العزف كأسلوب شخصيةوحياة
و رحت دور ع اغنية بتعني رغد
واخترت أغنية للعظيم اللي انا بعشقه فرانك سيناترا
وكانت أغنية #yesterday الأمس
وصارت مفتاحي الأول عن مبارح اللي كنّا عايشينه
ومبارح اللي فقدناه،عن اللي كناه واللي صرناه
وهون بلشت أول خيوط حكايتي مع رغد
وخلال تقريبا عشرين يوم قدرت اعزف بالايدتين سوا وكمان غني معهم! اكيد لساتني ع قدي بس قدرت ولسا مكملة الطريق
شكرا لكل اللي آمنوا فيني
نور وهيثم خلقتوا بقلبي قوة وسعادة
وائل وحمزه وعلي انتوا الداعم الأكبر واللي تعبتوا معي وعلمتوني وصلحتولي أخطائي
شكرا للمخرج الفنان والصديق سيف سبيعي على المساحة الكبيرة اللي عطاني ياها لتقديم دوري لكون شريكة وكان شريك رائع
وإيمانه الكبير بكل شي بيخدم العمل
شكرا فادي نصر مشرف الديكور اللي هلكته بطلباتي ودايما كان حاضر وشكرا محمد المصري مهندس الصوت والعازف أصلا لحرصك
وشكرا لكل مخلص مؤمن بنفسه وبالآخر
#مال_القبان | Posted on 30/Mar/2024 01:16:59
